ಆವಿರ್ಭೂತ

 ಶೃಂಗದುತ್ತುಂಗದಾಲಯದ ಶಿವಲಿಂಗದಲಿ

ಭಂಗವಾದರು ಮೆರೆವ ಶಿಲ್ಪಶಿಲೆಯಲ್ಲಿ

ಅಂಗನೆಯ ಕೊರಳೊಡವೆಯಲಿ ಹೊಳೆವ ಮಣಿಯ

ಅಂಗಳದ ಚುಕ್ಕಿ ರಂಗೋಲೆಯಲ್ಲಿ

ಚಂದಿರನ ಬಿಂಬತೋರುವ ಕೊಳದ ತಿಳಿಯಲ್ಲಿ

ಬಂದು ತೀರವ ಸೋಕಿ ತೆರಳುವಲೆಯಲ್ಲಿ

ಕಂದನಳುವಿಗೆ ಮಿಡಿವ ಕಣ್ಣಹನಿಯಲ್ಲವನೆ

ಮಿಂದು ಮೀಯಿಸುತಿರುವ ಬಿರುಮಳೆಯಲಿ

ಕೆಂಪಾಗಿ ತಾನುರಿದು ಅಟ್ಟುತಿಹ ಕೆಂಡದಲಿ

ಸೊಂಪಾದ ಬಿಸಿಲ ಧರೆಗೀವ ರವಿಯಲ್ಲಿ

ತಂಪನೆಯ ತುಂಬುತಿಂಗಳ ಬೆಳಕಿನಲ್ಲವನೆ

ಕಂಪಿಸದ ದೀವಿಗೆ ಜ್ಯೋತಿಯಲ್ಲಿ

ಕಾಣುವುದ ಕಿತ್ತೊಗೆವ ಚಂಡಮಾರುತದಲ್ಲಿ

ಆಣತಿಗೆ ಏರಿಳಿವ ಯೋಗಿಯುಸಿರಲ್ಲಿ

ವೇಣುವಿನೊಳಗೆ ಸುಳಿದುಲಿವ ಗಾಳಿಯಲ್ಲವನೆ

ಪ್ರಾಣವಾಗೆಲ್ಲ ಜೀವಿಗಳೊಡಲಲಿ

ಶತಕೋಟಿ ಬೆಳಕವರ್ಷವ ಮೀರಿದೆಡೆಯಲ್ಲಿ

ಅತಿಸೂಕ್ಷ್ಮ ರೇಣುವಿನ ಪರಿಧಿಯಲ್ಲಿ

ಮತಿಗೆ ನಿಲುಕದ ಜಗದ ವಿಸ್ತಾರದಲ್ಲವನೆ

ಪ್ರತಿಕಣದೊಳಡಗಿರುವ ಶೂನ್ಯತೆಯಲಿ