ಬಾನಾಡಿ

ಪಂಜರದ ಬಾನಾಡಿ ಭವ ಭಾವಗಳ ಬಂದಿ

ಉಸಿರ ಬಲದಿಂದೆಂತೋ ಜೀವಿಸಿಹೆನು

ಹಾತೊರೆಯುತಿದೆ ಜೀವ ನೀ ರೆಕ್ಕೆಯೊಳಹೊಕ್ಕು

ಬಿಡುಗಡೆಯ ಗರಿಗುಸಿರ ತುಂಬುವುದನು

ಓ ಗಾಳಿಯೇ ಬಾನ ನೀಲಿಯನು ನೀ ಸೋಕಿ

ತಾ ನನ್ನ ಬಳಿಗದರ ವಿಸ್ತರವನು

ಶರಧಿಯಲೆಗಳ ದನಿಯ ಕರಗಿಸುತ ನಿನ್ನೊಳಗೆ

ಬಳಿಸುಳಿದು ಮತ್ತುಲಿದು ತಣಿಸೆನ್ನನು

ಮಲೆಗಳೆತ್ತರದ ನಿರ್ಭಾರದನುಭವ ಸಾರ

ಹರಿಸಿಬಿಡು ಇದ್ದಲ್ಲೆ ತೇಲಿಬಿಡುವೆ

ಕಾನ ಬಗೆ ಬಗೆ ಹಸಿರ ಸತ್ವ ಲೇಪವ ತಂದು

ತೀಡಿಬಿಡು ಹೊಸಬಣ್ಣವನ್ನೆ ತಳೆವೆ

ಗರಿದುಂಬಿದಾಸೆಗಳು ನೂರೆಂಟು ಕನಸುಗಳು

ನನ್ನಂತೆ ಸಂಕೋಲೆಗಳ ಮಿತಿಯಲಿ

ಹೊರಳಾಡುತೆನ್ನೆದೆಯ ಹಾಡಾಗಿ ಹೊಮ್ಮಿಹವು

ನಿನ್ನಾಲಿಕೆಯೆ ನನ್ನ ನಲಿವಾಗಲಿ