ಶೂನ್ಯ

ನಾನೆಂಬ ರಿಕ್ತತೆಯ ವ್ಯರ್ಥ ಕೊಡುಗೆಯ ತಂದು

ನಿನ್ನ ಪೂರ್ಣತೆಗೀವ ದಿಟ್ಟತನದಿಂದ

ಬಂದು ನಿಂತಿಹೆ, ನೋಡು, ನಾ ಹಿಡಿದ ಜೋಳಿಗೆಯ

ತುಂಬೆಲ್ಲ ನಿಸ್ಸಾರ, ನಿಸ್ತೇಜ, ಮಂದ

ಬೇಕೊ ಬೇಡವೊ ನಿನಗೆ ನಿನ್ನಡಿಯ ಸೋಕುವುದು

ನಿರ್ವರ್ಣ ನಿರ್ಗಂಧ ಸುಮರಾಶಿ ಬರಡು

ಸೊಗವಿರದ ಯಾವುದೋ ಭಾವಗಳ ಬಸಿಯುತ್ತ

ಹೊಸತು ಚಿಗುರನು ಕಾಯುತಿಹುದೊಡಲ ಕೊರಡು

ನನ್ನ ಮೌನವ ಮಾರ್ದನಿಸಲಿ ನಿನ್ನಿರುವೆಂದು

ಹೊಯ್ದಾಡುತಿದೆ ಮನದಿ ಹಂಬಲಿಕೆ ಹಣತೆ

ಇಲ್ಲದಂತಿರುವ ನನ್ನಿರುವ ನೀನೊಪ್ಪಿದರೆ

ಕಾಣುವೆನು ನಾನಾಗ ಶೂನ್ಯದಲು ಸಮತೆ