ನಿನ್ನೆಡೆಗೆ

ಬಿಸಿಲ ಝಳಪಿಸುತಿರುವ ದೂರದ ಹಾದಿಯಲಿ

ನೆಳಲ ಕನಸಿನ ನೀರು ದಾಹ ನೀಗಿ

ತಂಗಾಳಿಯದೊಂದೆಲ್ಲೋ ಸುಳಿವು ಬಂದಂತಾಗಿ

ಮುನ್ನಡೆವೆ ನಿನ್ನೆಡೆಗೆ ಮತ್ತೆ

ಬಣ್ಣಗಳ ಚಿತ್ತಾರ ಮಾಯೆ ಭಿತ್ತಿಯ ಸೆಳವ

ಮೀರಲಾರದೆ ಅಲ್ಲೇ ಕದಡಿ ಹೋಗಿ

ಬಣ್ಣ ಮೆತ್ತದ ಬಿಳಿಯನೆಲ್ಲೋ ಕಂಡಂತಾಗಿ

ಮುನ್ನಡೆವೆ ನಿನ್ನೆಡೆಗೆ ಮತ್ತೆ

ಮಬ್ಬ ತೆರೆ ಸೆರೆಯಲ್ಲಿ ಬೆಳಕಿರಲು ಮರೆಯಲ್ಲಿ

ಸುರಿಯಲಾರದೆ ಸೋನೆ ಹೆಪ್ಪುಗಟ್ಟಿ

ಮಿಂಚಿ ಹೋಗುವ ಹೊಳಪಿನಂಚು ಸಿಕ್ಕಂತಾಗಿ

ಮುನ್ನಡೆವೆ ನಿನ್ನೆಡೆಗೆ ಮತ್ತೆ

ಏನೋ ಹೇಳುವ ಭರದಿ ಪದಗಳಷ್ಟನು ಕೂಡಿ

ಅರ್ಥ ಲೇಪದ ವ್ಯರ್ಥ ಸಾಹಸದಲಿ

ಪದಗಳಂಕುಶ ಮೀರಿ ಭಾವ ಹರಿದಂತಾಗಿ

ಮುನ್ನಡೆವೆ ನಿನ್ನೆಡೆಗೆ ಮತ್ತೆ