ಇರುಳುದಾವರೆ

 

ಇಳಿಸಂಜೆ ಬಾನಲ್ಲಿ ಬಣ್ಣಗಳ ಉತ್ಸವದ

ಮರೆಯಲ್ಲಿ ನಿರ್ವರ್ಣ ಏಕಾಂತವೊಂದು

ಸುಳಿವಾಗ ರಜನಿಯೆಳೆಯೆಳೆಯಾಗಿ ಮೃದುವಾಗಿ

ಸಂಭ್ರಮಿಸುತಿದೆ ಕೃಷ್ಣಕಂಪಲ್ಲಿ ಮಿಂದು

ತರುವಿನಾಸರೆಯಿಂದ ಮರೆಯಾಗಿ ಹಾರಿದರೂ

ಹಿಂಬಾಲಿಸಿದೆ ಹಕ್ಕಿಯ ಗೂಡ ಬಂಧ

ಆ ಬೆಚ್ಚನೆಯ ನೆಲೆಯ ಮತ್ತೆ ಸೇರುವೆವೆನುತ

ಸೆಳವಿನೆಡೆ ನುಗ್ಗುತ್ತಿದೆ ಖಗವಾಣಿವೃಂದ

ಬೆಳಕೆಂಬ ಸಾಂತ ಸುವಿಹಾರ ಚಾಂಚಲ್ಯದಲಿ

ವ್ಯಸ್ತ ಮನವಿನ್ನರಸಲಿ ನ್ಯಸ್ತ ಮುದವ

ಕಣ್ಮುಚ್ಚಿನಲಿ ಹೊಕ್ಕು ಅಮಿತ ನಿಶೆಯಿನಿ ಕಪ್ಪು

ತೆರೆಯಿಸಲಿ ಇರುಳುದಾವರೆಯರಳ ಕದವ