ಬಿಂಬ

 ನೀ ನನ್ನೊಳಿಹೆಯೆಂಬ ಸಾಂತ್ವನವೆ ಸಾಕೆನಗೆ

ತೊರೆದುಬಿಡುವೆನು ನಿನ್ನ ಹಂಬಲವನು

ಎಲ್ಲೋ ಮರೆಯಾಗಿರುವೆ ಕಾಣಲಾರದೆ ದೂರ

ನಿನ್ನ ನೆನಪಲೆ ನಿನ್ನ ತುಂಬಿರುವೆನು

ನಿನ್ನ ಮೆಚ್ಚಿಸಬೇಕು ಎಂಬ ಹಠವಿನ್ನಿಲ್ಲ 

ಹಾವ ಭಾವಕೆ ಸೂತ್ರಧಾರಿ ನೀನು

ಆದರೂ ನನ್ನಣುವಣುವಿನಲ್ಲು ನೀ ಕರಗಿ

ನನ್ನನಾಳುವ ಪರಿಯ ತೋರಲೇನು?

ಭಾವಗಳ ತಿಳಿನೀರ ಕೊಳದಲ್ಲಿ ಮಿಂದೆದ್ದು 

ಹೊಳೆವೆ ನೀ ಮಣಿಯಂತೆ ಕಣ್ಣ ತುಂಬ

ಆ ಹೊಳಪಿನಲಿ ಮಂದ ಬೆಳಕಿನಲಿ ಬೀಗುವುದು

ನೀನಾಗಿ ಹೋಗಿರುವ ನನ್ನ  ಬಿಂಬ