ಜ್ವಲಿತ

ಬಣ್ಣಬಣ್ಣದಿ ಮಿಂದು ನಲ್ಮೆಯನು ತಳೆಯುವೆನು

ಜಗದ ಕಣ್ತುಂಬುವೆನು ಹೂವಾಗಿ ಅರಳಿ

ಸುಳಿಗಾಳಿಗೀಯುವೆನು ನನ್ನೆಲ್ಲ ಕಂಪನ್ನು

ಕಾಯುವೆನು ಜಾರಿಹೋಗಲು ಭುವಿಗೆ ಮರಳಿ

ಪದವಾಗಿ ಮುದವಾಗಿ ಹದವಾಗಿ ಮೂಡುವೆನು

ಮನಗಳಲಿ ಏರಿಳಿವ ಭಾವದಲೆಯಾಗಿ

ಮೋದ ಉನ್ಮಾದಗಳ ಹಾಡಿನಾಲಿಕೆಯಾಚೆ

ಕಾಯುವೆನು ಹಿನ್ನೆಲೆಯ ಮಂದ ಶ್ರುತಿಯಾಗಿ

ದಿನದ ದಣಿವಲ್ಲಿ ಗೆಲುವಲ್ಲಿ ಛಲದಲ್ಲೆಲ್ಲ

ಸಿಲುಕುವೆನು ನಾನೆಂಬ ದುಸ್ತರದ ಬಲೆಗೆ

ತಿಮಿರದಾಲಿಂಗದಲಿ ಕಳೆದು ನನ್ನೆಲ್ಲವನು

ಕಾಯುವೆನು ಕರಗಿಹೋಗಲು ಶೂನ್ಯದೊಳಗೆ

ಬಾ ದಿವ್ಯವೇ ತೋರು ಮೂರ್ತರೂಪವನೊಮ್ಮೆ

ಮರ್ತ್ಯತೆಯ ಹಂಬಲಿಕೆಗಾಗು ನೀನಮೃತ

ನಿನ್ನ ಕಣ್ಬೆಳಕ ಹೊನಲಿನ ಹೊನ್ನ ಹಾದಿಯಲಿ

ಮಾಡಿಬಿಡು ಈ ಧೂಳಕಣವನ್ನು ಜ್ವಲಿತ