ಕೋರಿಕೆ

 ಮಣ್ಣ ಮೇಲಿನ ಗೆರೆಯ ಮಾರ್ಗದಲಿ ಹುಳುವಾಗಿ

ಬಿಟ್ಟು ನನ್ನನು ದಿಕ್ಕು ತಪ್ಪಿಸಿದಿರು

ಸಿಕ್ಕುದಾರಿಯಲಿ ದಿಗ್ಭ್ರಾಂತಿಯಲಿ ತಡವರಿಸಿ

ಬಿದ್ದೆದ್ದು ನಾ ನಡೆಯೆ ಅಣಕಿಸದಿರು

ನಾ ಕಲಿತ ಅಕ್ಷರವ ಹೋಲದಂತಾವುದೋ

ಗೀಚಿರುವ ಗೌಪ್ಯ ಬಗೆಯುವುದು ಹೇಗೆ

ಮಿಂಚಿಸುತ ಸುಳಿವನ್ನು ಮರುಚಣವೆ ಮರೆಮಾಚಿ

ಬೀಸಿರುವೆ ನನ್ನೆದುರು ಚಳಕ ಸೋಗೆ

ಅನುಕಂಪದೆಲರಾಗಿ ನಸುವಾಗಿ ನಿನ್ನೊಗಟ

ಜಾಟಿಲ್ಯದಿಂದೆನ್ನ ಮೇಲೇರಿಸು

ನಿನ್ನ ಮಾರುತದಳವಿನನುಭಾವಿ ಗಿರಿಯಾಗ್ರ

ವೀಕ್ಷಣೆಯ ಯೋಗದಲಿ ನನ್ನನಿರಿಸು

ಅಂತರಾರ್ಥವಿಹೀನ ಬರಿದೆ ನುಲಿವಿನ ಲೇಖ

ನಲುಗಿಸಿದೆ ಎದೆಯ ತನ್ನುರುಲಿನಲ್ಲಿ

ಆಲಿಂಗಿಸೆನ್ನ ತೋಯಿಸು ಜೀವದಾಕುಲವ

ಒಡಲಿನಾಳದ ನಾದದಮೃತದಲ್ಲಿ